賺好少~?

最近轉左會,由經經常去o既大x山單車店,變左比較多去另一間叫大x人單車店,其實都係因為一個錢字,親眼睇到錢點去改變一個人~
本身第一架6百蚊o既單車,玩左一陣,因為朋友仔o既關係,佢帶左我去小泉(唔係純一郎)o既鋪,因為佢同佢老婆好熱心亦好有耐心咁解釋同教我單車知識,技術技巧,當時仲係跑緊freelance o既我亦o係佢度出左一部單車,價已過千,而且用碟剎,之後亦日日無野做都會走落去佢鋪頭,當然自有長工返之後,都o係佢度洗左唔少錢,有時明知佢d野貴過其他店舖,都幫襯佢,主要都係因為佢兩公婆又好傾亦樂於助人,熱心教人,幫手,就算錢銀野都有得傾,當然當時我地一眾熟客亦幫佢鋪頭唔少,因為得佢一個人做,有時佢幫我地裝野有時大意裝得唔好裝漏野,都會體諒佢,不過自從一次佢幫我裝大鍊餅,一邊脾無上實,我去完深屈返去佢鋪頭叫佢check d野,佢一掂,成隻脾跌左落黎,我先醒悟,當日我有可能已經死左,隻脾如果o係我落幾條大斜時甩左,真係唔死都重傷~
一段時間之後,一眾熟客仲要去幫佢咁介紹d朋友幫襯佢,佢亦好似入左大運咁,大把外國人去幫襯佢,佢個人就好似d暴發戶咁,當初o個d所謂"貴人少少因為會跟長期良好售後服務"已經變質,做野成日求其攪一攪就算,都唔試真少少,令到好多人轉頭又出現問題~繼續大意裝漏野,生意好左咁多野又貴過人都唔請個人幫手~有d大問題d零件好可能要換或返代理整,佢亦經常用"心理作用"黎耍走d客,我對碟剎就係俾佢當我係精神病人咁攪左十幾次佢都頂唔順,最後都要死死地氣幫我攞返代理整,結果代理就係整好俾返我~又話到左call我,結果我唔追都唔知已經返左黎,係我心理作用定係有人整唔到又懶幫我攞返代理呢?
一間o係自己村屋開鋪,唔洗租金,地方又大,因為係原住民唔洗俾堂口收陀地,水費都唔洗俾,又慳唔請員工o既鋪頭~都成日話自己賺好少,貴過人都係收返合理回報,咁人地出面租鋪,又有員工都仲賣得平過佢,係唔係日日食屎唔食飯先生存到呢?呢樣真係好學唔學~d電腦鋪成日話一塊底板賺十蚊,香港而家人人有電腦仲個個去高登出機咩?只係賺砌機3百蚊一部,可以養咁多人,又俾租金電費,一日要砌幾多部先夠呀,有幾多客俾你分呀? d打手成日o係forum話,我做過sale,真係賺十蚊架咋~真係賺咁少,中央田可以請咁多人行行企企仲,分店開完一間又一間,就黎成個高登都變成中央田,賣白粉呀?請人開分店可以唔洗錢?一餅雞蛋仔都賺一倍啦,做咩仲賣底板?單車野又係賺咁少?賣咩單車件呀?賣雞蛋仔啦,十蚊底可以賺5蚊呀~唔洗售後服務架~
最近買左隻casio錶,以前聽幾位做手錶設計o既朋友講,幾貴o既銀,隻錶肉都你平到你唔信,貴表都係貴在錶殼錶面設計同做工,一隻成本八十幾蚊o既錶,零售係賣6千幾蚊,我隻錶標價1680,水貨都好啦,竟然折左可以做$585俾我,平時如果唔係咩俾成本價俾我,食水可以幾深呢~?而又聽聞某曾經做過賣水晶o既朋友講d水晶串手鐲賣百幾蚊左右o既,基本上只係跟大貨一齊返o既平到唔洗錢o既下欄野,只要佢賣到同批貨d貴石,佢d平野就已經係0成本,賣到一百就淨袋一百~而家最近睇中本來想買俾人o既一條月亮石,本我買左o既一條,只係一條d石大粒小小同有藍光,一條2百都唔洗,一條2千~
其實如果成日怨賣電腦野同單車野賺得少o既,不妨轉行賣錶同水晶丫~