星期五, 7月 24, 2009

Le Tour de France ~CAVENDISH

今晚o岩o岩睇完環法單車賽Le Tour de France,已經得19站,4年後復出的Lance ARMSTRONG又話黎玩下,結果黎呢個好多人都話唔係人玩o既變態road bike多日賽,暫時總成績第3,諗記前兩日上東涌道只係2百幾米我已經半死,佢地差不多每站踩百幾二百公里,仲要上埋d海拔二千四百米o既HC級山,上到山頂之前仲可以站起身爆車追人/突圍,o個d斜度仲可以踩o個d速度,人o既潛力真伙好勁,ARMSTRONG癌症之後,連嬴7次環法,退出左4年又黎玩,仲要而家總成績第3,真係超勁~
自前年有追有線直播環法,先發現,踩單車一樣要有策略,有戰術,唔只體力咁簡單,資訊戰,心理戰一樣重要,當年因為一個牌子,喜歡上一個車隊,當年用台灣品牌GIANT單車o既德國T-Mobile雖然成績唔太好,不過主力KIRCHEN Kim我已經覺得佢好勁,當然當年總冠軍同今年黃色戰衣仲帶緊頭o既CONTADOR Alberto超勁,不過當然我唔係好鐘意無左ARMSTRONG o既Discovery隊,上年T-Mobile同Discovery都解散左,T-Mobile大部份人馬由領隊改組新名team high road隊(上年環法時命名為Team COLUMBIA)有一名有趣人物一鳴驚人:Mark CAVENDISH,2006年佢有o係T-Mobile,有出環法,不過無成績,上年佢因為備戰奧運,未跑晒21站就退出,但已經嬴左4個分站冠軍,佢o個d超級衝刺能力極勁,一齊衝線,比人遲起步一樣後上衝嬴人~
今年Team COLUMBIA多左個sponsor,加多左個牌子,叫Team COLUMBIA-HTC,CAVENDISH呢個傻仔仲o係其中一站衝線時幫HTC賣廣告,真係有趣~
除左總成績領先o既車手可以穿上黃色戰衣之外,仲有一件叫綠色戰衣,係靠賽站中途一d衝刺點同終點衝刺攞分,中途衝刺第頭幾個先經過衝刺點的車手有分,不過都係得幾分,而衝終點攞分站冠軍就有35分,CAVENDISH嬴到今年環法第5個分站冠軍,全部都要多謝隊友百幾公里一路護住佢,最後幾公里不惜氣力幫佢o係前面帶車確保衝刺路線及位置,仲有佢自己o既驚人爆炸力,就算俾人搶左先機衝左先,佢亦可o係好短距離同時間下加速後上過頭衢冠軍,主要對手,而家仲著住件綠色衝刺王戰衣的HUSHOVD曾經同CAVENDISH同步鬥衝都一樣輸,結果就轉戰略,o係兩位衝刺型車手都唔掂o既登山路段,一開始就跑出,攞晒d中途衝刺點分,衝完就收皮,就算最尾返都唔緊要,因為CAVENDISH完全攞唔到中途衝刺點分,過終點亦唔可能o係20名以內,一分都攞唔到,而HUSHOVD自己就靠中途衝刺點分過頭領先綠色戰衣榜~
今站CAVENDISH一樣靠隊友帶佢去到最後幾百米仲o係頭位,不過隊友比之前賽站更早用盡體力,要CAVENDISH自己提早衝刺,我好擔心佢KEEP唔到爆咁長距離咁長時間,聽barry講佢就用左室內場地賽的技巧,用細d齒輪比,keep住輕腳高轉速維持長時間高速爆車,相反HUSHOVD及其他對手就用住大齒輪比重腳左,無佢可以爆咁耐,結果又俾CAVENDISH衝多一站冠軍!在上年一鳴驚人之後,今年有站都俾人請佢坐包廂,困住佢o係車堆中間唔俾佢出黎衢,不過佢仲可以cut個大外檔衝返個第3返黎,加上踩左咁多日,已經無咁多車隊妹仔有力上黎圍佢請佢坐包廂,佢要衝真係無咩人阻到佢,聽日HC級山又洗預佢,不過最後一站返巴黎跑香謝麗舍大道睇下Mark CAVENDISH可唔可以衝多一站冠軍~剛打破英國車手o係環法攞8個分站紀錄o既佢,可唔可以攞埋第10個,攞唔返綠色戰衣都唔緊,跟本就無一個車手就算綠色戰衣HUSHOVD都要衝輸俾佢,o係我心目中,佢先係真正的衝刺王~!就好似我鐘意o既巴塞同亞仙奴,世上多數人只會著重球隊o既成績,但過程踢得是否悅目,組織漂亮先重要,唔係嬴波唔重要,不過如果只係要羸,過程沉悶或贏得肉酸,不如只係睇精華算啦~!又好似Mark CAVENDISH,唔係只係靠中途衝刺分,係實實在在o係大家面前無論先發定後上都衝羸,堂堂正正o係你面前衝羸你o既,先係真正衝刺王~! o係你面前用組織入滲,搓散晒你個後防先入你波,先係好睇足球,唔係一個球員遠射呀,死球頭槌撞散你黎入,洗鬼11個人踢呀~
衝羸o既姿勢係幫sponsor介紹HTC電話 /幫埋Oakley賣廣告~

衝刺王綠色戰衣都唔夠衝,邊個先係衝刺王呢/剩下一顆旦旦的最強的男人Lance ARMSTRONG

沒有留言: